மேகதாது அணை, தமிழ்த்தாய் வாழ்த்து உள்ளிட்ட முக்கிய விவகாரங்கள் குறித்து ஆலோசனை

தமிழ்நாடு முதலமைச்சர் சி. ஜோசப் விஜய், முதலமைச்சராக பதவியேற்ற பிறகு முதல் முறையாக டெல்லிக்கு அதிகாரப்பூர்வ பயணம் மேற்கொண்டு பிரதமர் நரேந்திர மோடியை சந்தித்தார். இந்த சந்திப்பு தேசிய அரசியல் வட்டாரங்களில் பெரும் கவனத்தை ஈர்த்துள்ளது.

டெல்லியில் நடைபெற்ற இந்த சந்திப்பில், தமிழ்நாட்டைச் சார்ந்த பல முக்கிய பிரச்சனைகள் குறித்து முதலமைச்சர் விஜய் விரிவாக எடுத்துரைத்ததாக தகவல்கள் தெரிவிக்கின்றன. குறிப்பாக கர்நாடக அரசு முன்னெடுத்து வரும் மேகதாது அணை திட்டத்திற்கு தமிழக அரசு கடும் எதிர்ப்பு தெரிவித்து வரும் நிலையில், அந்த திட்டத்தை மத்திய அரசு தடுக்க வேண்டும் என விஜய் வலியுறுத்தியதாக கூறப்படுகிறது.

மேலும், அரசு விழாக்களில் “தமிழ்த்தாய் வாழ்த்து” பாடலை கட்டாயமாக ஒலிப்பதற்கான நடைமுறைகள் மற்றும் அதனைச் சுற்றியுள்ள விவாதங்கள் குறித்தும் முதலமைச்சர் விஜய் பிரதமருடன் பேசியுள்ளார். தமிழ்மொழி மற்றும் தமிழர் அடையாளத்திற்கு உரிய மரியாதை கிடைக்க வேண்டும் என்ற கோரிக்கையையும் அவர் முன்வைத்ததாக தகவல் வெளியாகியுள்ளது.

இதனுடன், இலங்கையில் கைது செய்யப்பட்ட தமிழக மீனவர்களின் விடுதலை, காவிரி நீர் பகிர்வு, பாதுகாப்பு ஆராய்ச்சி மையங்கள் அமைத்தல், மெட்ரோ ரயில் திட்டங்களுக்கு நிதி ஒதுக்கீடு போன்ற பல்வேறு மாநில வளர்ச்சி தொடர்பான கோரிக்கைகளையும் முதலமைச்சர் விஜய் மத்திய அரசிடம் வலியுறுத்தினார்.

பின்னர் மத்திய நிதியமைச்சர் நிர்மலா சீதாராமனையும் சந்தித்த விஜய், தமிழகத்தின் துறைமுகங்கள், தேசிய நெடுஞ்சாலைகள், ரயில்வே மற்றும் தொழிற்துறை வழித்தடங்களுக்கு கூடுதல் நிதி ஒதுக்க வேண்டும் என கோரிக்கை மனுவை வழங்கினார்.

முதலமைச்சராக பொறுப்பேற்ற பின்னர் விஜய் மேற்கொண்ட முதல் டெல்லி பயணம் என்பதால், இந்த சந்திப்பு தமிழக அரசியல் மற்றும் மத்திய-மாநில உறவுகளில் முக்கிய திருப்பமாக பார்க்கப்படுகிறது. அரசியல் வட்டாரங்களில் இந்த சந்திப்பு எதிர்கால கூட்டணிகள் மற்றும் மத்திய அரசுடன் தமிழகத்தின் உறவை தீர்மானிக்கும் முக்கிய முன்னேற்றமாக மதிப்பிடப்படுகிறது.